ROXAS CITY, CAPIZ – Padayon ang Department of Social Welfare and Development (DSWD) Region VI sa paghatag sang bulig sa mga apektado nga pamilya sa Western Visayas matapos ang pagbaha kag hagupit sang habagat nga ginpakusog pa sang Bagyo Crising.
Sa interview sang Bombo Radyo kay Therese Fely Legaste, Regional Information Officer sang DSWD VI, iya ginpahayag nga naka-distribute na ang ahensya sang food kag non-food items nga nagabalor tanan sang P21.5 million.
Base sa ulihi nga report sang talatapan as of 5:00 pm, July 21, may kabug-usan nga 83,681 ka pamilya ukon 306,271 ka indibidwal ang apektado sa 591 ka barangay sa rehiyon. Sa sini nga datos, 12,929 ka pamilya ang na-displaced kag nagsulod sa evacuation centers, apang subong 1,485 na lang ang nagapabilin, samtang ang iban nakapauli na sa ila tagsa ka panimalay.
Naglab-ot naman sa 11,364 ka pamilya ang apektado nga ara sa guwa sang evacuation centers.
Ang probinsya sang Negros Occidental ang may pinakamadamo nga numero sang pamilya nga apektado kun sa diin naglab-ot sa masobra 46,000 ka pamilya. Sunod amo ang Antique (22,873), Capiz (4,894), Iloilo Province (4,265), Iloilo City (3,529), Aklan (1,587), kag Bacolod (5).
Samtang yari ang mga lugar sa rehiyon nga nakabaton sang bulig halin sa DSWD pinaagi sa food kag non-food items amo ang mga masunod:
- Negros Occidental – P13,790,995 million
- Antique – P3.764, 872 million
- Iloilo City – P1,969,874 million
- Capiz – P991,356
- Aklan – P558,328
- Iloilo Province – P289,940
Suno kay Legaste, may ara bastante nga stockpile sang relief goods sa ila mga warehouses ang DSWD VI nga naga-total sang P77.1 million, may dugang pa nga food kag non-food items nga nagabalor sang P48 million, kag may standby fund nga P2.7 billion.
Dugang pa sang natungdan nga nagapadayon ang koordinasyon sang DSWD Region VI sa mga local government units (LGUs) agud masiguro nga mahatagan sang bulig ang tanan nga apektado nga pamilya.
– Interviewed by: Bombo Lynd-C Bade