ROXAS CITY – Nagapadayon ang pag-proseso sang Department of Social Welfare and Development Office ukon DSWD Region-6 sa mga nasumiter na nga mga listahan sang mga benepisyaryo sang Social Amelioration Program ukon SAP sa bilog sa Western Visayas.
Ginpahayag ni Ms. Mae Rago – Castillo, Public Information Officer sang DSWD Region-6 nga nagalab-ot sa 1.8 milyon ka mga pamilya ang target sang DSWD nga hatagan sang P6, 000 nga ayuda sa bilog nga Rehiyon Sais sa sulod sang duha ka bulan.
Suno sa kay Rago nga ang ginahatagan sang prayoridad sang talatapan ang mga pamilya nga labing apektado sang Enhanced Community Quarantine nga may isa ka miyembro sini nga kalakip sa informal economy workers kag gikan sa vulnerable sector.
Ginkumpirmar ni Rago nga ang mga barangay officials ang naga-identify sa mga benepisyaryo kag naga-sumiter sang listahan sa talatapan.
Apang ginpasalig ni Rago nga ang mga nabaton nga mga listahan sang benepisyaryo gikan sa LGU’s ang ginapaidalum sa maid-id nga validation sang talatapan.
Ginpasalig ni Rago nga gilayon nga ma-release sa labing madali nga panahon ang nasambit nga ayuda bangud madasig man ang pagsumiter sang mga LGU’s sang mga listahan sang benepisyaryo kag validation sini.
Gindugang pa sini nga ang pondo sang nasambit nga ayuda ang yara na sa karon sa ila nga talatapan.
Gin-athag man sini ang mga benepisyaryo nga kwalipikado nga makabaton sang Social Amelioration Package ukon SAP.
Ginpahayag sini nga sarang makabaton ang nagalumon sa balay apang nagakahilanglan nga ini ang kwalipikado sandig sa ila nga guidelines.
Gin-athag man ni Rago nga makabaton man ang mga indi residente sa isa ka barangay apang nakadapat nga kwalipikado man ini sa guidelines para sa amo nga programa apang indi na ini makabaton pa sang ayuda gikan sa barangay kun sa diin siya naga-istar.
Ginpangabay ni Rago sa mga barangay officials nga likawan nga magpangita sang voter’s ID sa mga ginalista bangud indi kahilanglan nga botante ang isa ka benepisyaryo sang nasambit nga ayuda.
Kalakip sa mga kwalipikado nga makabaton sang ayuda amo mga Pantawid Pamilyang Pilipino Programs (4P’s) beneficiaries kag mga informal economy workers ukon mga nagatrabaho nga wala sang employer kg nagikan sa vulnerable sectors kapareho sang senior citizens, Persons with Disabilities ukon PWD’s, nagabusong ukon nagapasuso nga iloy, solo parent, mga indigenous people kag mga unpriviledged homeless nga mga indibidwal.
Ginklaro ni Rago nga ang mga formal economy workers ukon mga trabahante nga may yara sang employers ang indi na makabaton sang ayuda.
