ROXAS CITY – Target sang Department of Social Welfare and Development (DSWD) Regional Office 6 nga mabayaran ang tanan nga mga senior citizen nga benepisyaryo sang social pension para sa tuig 2019 sa Pebrero 20, 2020.
Ginpahayag ni Judith Barredo, focal person sang DSWD Regional Office 6 for the elders, sa 47mil nga mga senior citizen, 85-90 porsyento na ang nakabaton sang ila nga social pension.
Naka-schedule na ang ila nga pagpadulong sa mga kabawahanan para sa payout sang mga katigulangan nga kalakip sa programa sang ahensiya.
Ginklaro man ni Barredo sa iban nga mga senior citizen nga wala malakip sa listahan kag wala nakabaton sang social pension nga indi buot silingon nga ginkakas na sila.
Ginpahangup sini sa mga benepisyaryo nga indi tingub kundi amat amat ang pagpaguha sa listahan gikan sa ila central office sa diin nakapagkit ang pangalan sang mga senior citizen beneficiaries.
Kun matabuan nga wala ang ila pangalan subong nga payout, nalakip ini sa masunod nga batch.
Gin-athag pa ni Barredo nga nagapabilin ang pondo sang programa sa DSWD kag wala gintransfer ang pondo sang social pension sa mga LGU’s.
