Ginhangkat ni Kamanggagawa Party-list Representative Elijah San Fernando si Department of Trade and Industry (DTI) Secretary Cristina Roque sa “P500 Noche Buena Challenge” agud pamatud-an nga nagakabagay ang nasambit nga kantidad para sa simple nga noche buena.
Sa video post nga gin-share sang mamalidha, iya ginhangkat ang chef sang DTI nga himuon ang challenge kun nagapati kag nagatindog sa kamatuoran nga nagakabagay sa isa ka noche buena ang kantidad nga lima ka gatos.
Gintanyagan man sang kongresista ang sekretarya nga magpili sang lugar ukon merkado nga kadtuan kag updan niya ini.
Ginpanindugan sang mamalidha nga ang pahayag sang tiglikom isa ka insulto sa tagsa ka trabahador kag ordinaryo nga Pilipino. Siling niya nga samtang matuod nga indi kinahanglan nga magarbo ang piesta, namangkot si San Fernando kon ano ang mabakal sang lima ka gatos ka pesos para sa isa ka simple kag disente nga Noche Buena para sa isa ka pamilya?
Ginpahayag ni San Fernando nga ang pahayag sang DTI labi nga naghalit sa pagsalig sang publiko, ilabi na sa panahon nga ginabatyag sang mga pamilya ang palas-anon sang mataas nga presyo sang mga balaklon, stagnant wages, kag uncertainty tuga sang flood control anomaly scandal.
