Gilayon nga ginapatuman sang Department of Trade and Industry (DTI) ang automatic price freeze sa tanan nga basic goods matapos gindeklarar ni Presidente Ferdinand “Bongbong” Marcos Jr. ang state of national calamity tuga sang kahalitan sang Bagyo “Tino” sa Visayas kag Mindanao.
Suno sa DTI, magapabilin ang price freeze sa sulod sang 60-days agud masiguro nga indi magtaas ang presyo sang basic needs sa mga apektado nga lugar.
Sa ila pahayag, ang ahensya nagsiling nga padayon sila nga nagapakig-angot sa mga manufacturer, retailer, kag distributor agud mamentinar ang nagakaigo nga suplay sang mga nagapanguna nga mga balaklon kag prime commodities.
Ginpasalig man sang DTI nga alerto kag handa ang ila talatapan sa rehiyon kag probinsya sa pagpatuman kag pagbantay sa pagsunod sang mga establisemento sa price freeze.
