Target sang Department of Trade and Industry (DTI) nga makakuha sang masobra P1 bilyon nga kita gikan sa mga national trade fairs subong nga tuig.
Suno kay DTI Assistant Secretary Nylah Rizza Bautista, tuyo nila nga malab-ot ini pinaagi sa paghiwat sang indi magkubos sa 13 ka national trade fairs subong nga tuig.
Ginalauman nga ang mga trade fairs ang magahatag sa mga micro, small, and medium enterprises (MSMEs) gikan sa 18 ka mga rehiyon sang dugang nga oportunidad sa pagpakita kag pagbaligya sang ila mga produkto.
Gin-anunsyo man sini ang pagbukas sang Coconut Philippines Trade Fair sa SMX Convention Center Manila, nga ginpasakopan sang ginabanta 300 ka mga micro, small, and medium enterprises halin sa coconut sector.
Nagapakita ini sang mga produkto nga nakabase sa lubi nga nagalakip sang pagkaon, wellness, personal care, furniture kag fashion.
