Magaserbe nga associate counsel sang defense team ni Former President Rodrigo Duterte ang bag-o nga abogado nga nadugang sa grupo.
Kahapon, Abril 8, sang ginpaguwa sang International Criminal Court (ICC) ang isa ka court filing nga nagapakita nga ginkuha sang defense team ang lagting nga abogado nga si Dov Jacobs.
Si Jacobs ang isa ka accredited ICC lawyer, kag eksperto sa international law kag international criminal law.
Siya ang nangin kabahin sang defense team sang anay presidente sang Ivory Coast nga si Pres. Laurent Gbagbo nga anay man nga nagapangatubang sa kaso nga crimes against humanity apang sang ulihi na-aquit sa Trial and Appeals Chamber sang ICC.
Kabahin siya sang defense team ni Mahamat Said Abdel Kani, isa ka former general gikan sa Central African Republic nga nagapangatubang sa nagkalain-lain nga kaso kasubong sang war crimes kag crimes against humanity sa international tribunal.
Si Jacobs ang nagaserbe nga assistant professor sang public international law sa Netherlands kag nagatudlo man sa pila ka unibersidad sa France.
Uyat niya ang pila ka degree gikan sa King’s College sa London, Paris I Panthéon-Sorbonne, Paris II Panthéon Assas, Sciences Po sa Paris, kag isa ka doctorate gikan sa European University Institute sa Florence, Italy.
Antes pa siya nangin kabahin sang defense team sang anay pangulo, una na siya nga nagpaguwa sang opinion angut sa nangin pag-aresto kay Duterte.
Kalakip sa iya nga ginpuna amu ang wala pag-respeto sa kinamatarong sang anay pangulo sa idalom sang Article 59 sang Rome Statute kasubong sang pagkalakip niya sa isa ka domestic court, antes siya ginlupad padulong sa The Hague kag dalayon nga ginpasulod sa detention facility sang international court.
