Ginalauman nga ang duha ka tuig dugang sa termino nga magahatag sang dugang nga tinion sa pagpatuman sang mga proyekto kag programa sa Barangay Cogon, Panay, Capiz.
Sa interview sang Bombo Radyo kay Punong Barangay Ariel B. Basilonia, iya ginpahayag nga wala niya ginalauman ang postponement sang 2026 Barangay kag Sangguniang Kabataan Elections, bangud nga nagahilapit na ini kag nakatalana na kuntani sa Nobyembre 2, 2026.
Suno kay Basilonia, sa iya nga termino natigayon nga matapos ang Multi-Purpose Activity ukon MPA building, samtang ginapaabot man ang solar lights nga ma-deliver kag ma-implement agud magamit sang komunidad.
Pahayag pa niya, sa una niya nga termino, gin-gamit ang bahin sang 20 percent nga development fund para sa pagpauswag sang MPA, lakip ang pagpatukod kag pagpa-improve sang gym nga ginagamit bilang basketball court, division hall sang barangay nga may glass divider kag air-conditioning, kag air-conditioned lobby agud mangin mas komportable ang mga pumuluyo nga nagakadto sa barangay hall.
Dugang pa sang natungdan, pinaagi sa dugang nga duha ka tuig sa termino, may yara pa sang madugangan nga oportunidad nga mapatuman kag mapauswag ang mga proyekto kag programa nga makabenepisyo sa pumuluyo sang Barangay Cogon.
