ROXAS CITY – Kapin sa 2mil 800 ka mga bag-o nga benepisyaryo sang Pantawid Pamilyang Pilipino Program ukon 4Ps sa probinsiya sang Capiz ang makabaton na sang ila nga cash grant sa ini nga quarter kun ila ma-comply ang tanan nga mga rekisitos.
Ginpahayag ni Beverly Salazar, provincial link officer sang 4Ps sa probinsiya sang Capiz nga ginpaidalum sa maidid nga validation ang listahan sang bag-o nga mga benepisyaryo sang 4Ps.
Indi malipod nga may 35mil 256 ka existing 4Ps beneficiaries sa karon ang probinsiya sa diin madugangan ini sang 2mil 800 ka bag-o nga benepisyaryo nga makabig indigents.
Ginkumpirma man ni Salazar nga may pila na sila ka mga benepisaryo nga ginkakas sa program, matapos na-validate ang pila ka mga complaint kasubong sa ila nga misbehavior kag sala nga paggamit sang cash grant.
May yara man nga ila gina-hold ang cash grant kag ginapadalhan sang sulat ang mga benepisyaryo.
Ginpanindugan pa ni Salazar nga wala nila gina-tolerar ang sala nga ginahimo sang mga 4Ps members, agud ila marealisar ang pagbulig sang gobyerno sa mga pigado nga mga pamilya, para makapadayon sa ila pag-eskwela ang mga kabataan.
