Pila ka mga anay bodyguards ni former Ako Bicol Party-list Representative Zaldy Co ang naghimo sang bag-o nga mga alegasyon matapos nga ginhingadlan sini ang iban pa nga opisyal sang gobyerno kag media personalities nga ginaalegar nakabaton sang kwarta nga nasulod sa maleta.
Ginbuyagyag sang isa sa mga ex-marines nga nasaksihan sini ang pagdeliver sang hand-carry bag nga may unod sang isa ka milyon ka pesos nga cash kay Commission on Elections (Comelec) Chairman George Garcia.
Suno sa testigo,ginabulubanta nagalab-ot sa P10 million ang unod sang bag nga gindul-ong kay Garcia.
Ginpangalanan man sang isa sa bag-o nga apat nga nagpakilala nga anay bodyguard ni AKO Bicol Partylist Representative Zaldy Co si Sen. Erwin Tulfo nga isa sa nakabaton sang maleta nga may unod nga kwarta gikan sa maanomalya nga flood control projects.
Matandaan nga ginpangalanan man si Tulfo sa nauna nga hearing nga gilayon man niya nga ginpanginwala.
Ginpakita man sang mga testigo ang mga laragway nga nagapakita sang ila ginasiling nga pagtililipon sang mga personalidad sa mga opisyal sang International Criminal Courtlakip lakip na si former Senator Antonio Trillanes IV, may kaangtanan sa kaso batok kay former president Rodrigo Duterte.
Suno sa mga nagtestigo, ang mga litrato nagasuporta sa ila alegasyon nga may koordinasyon sa tunga sang mga opisyal sang ICC, si Trillanes, Justice Secretary Jesus Crispin Remulla kag PNP Chief Nicolas Torre III may kaangtanan sa imbestigasyon kag kaso nga ginapangatubang ni Duterte.
Dugang pa sang mga testigo, nag-deliver man sila sang maleta sa balay ni Sen. Francis ‘Chiz’ Escudero.
Suno sa ila, nakadala sila sang apat ka maleta nga may unod nga kwarta kag nagkaon pa sila sa sulod sang balay ni Escudero kaupod ang iya kabulig.
Ginpahayag man sang isa sa mga testigo nga naka-deliver sila sang maleta nga nagaunod sang kwarta nga nagabalor sang P50–70 milyon kay Senator Francis ‘Kiko’ Pangilinan.
Makita sa laragway nga gin-presenter ang pamilya ni Senator Pangilinan kag ang maleta nga nagaunod sang kwarta.
Samtang, hugot naman ini nga ginpangin wala ni Pangilinan kag sang iya sini asawa nga si Sharon Cuneta ang pahayag sang anay bodyguard ni Co kag ginpahayag nga lunsay kabutigan ang mga alegasyon batuk sa ila.
Ginpahayag man sang mga anay bodyguards nga nagdeliver sila sang paper bags nga may unod nga kwarta sa pila ka mga media personalities nga ginalakipan sang TV journalist nga si Arnold Clavio kag columnist nga si Mon Tulfo.
Gilayon ini nga ginpanginwala ni Clavio kag ginhangkat ang mga nag-akusar nga magpakita sang ebidensya.
Samtang, ginkadlawan lang ni Mon Tulfo ang alegasyon kag ginkwestyon kun paano makasulod sa isa ka paper bag ang kaangay kadamo nga kantidad sang kwarta.
