ROXAS CITY – Tuman nga kinahanglan sang Capiz Rehabilitation Center (CRC), ang dugang nga pasilidad para sa mga Persons Deprived of Liberty (PDL).
Sa interview sang Bombo Radyo kay Arjona Yngcong Provincial Warden sang Capiz Rehabilitation Center (CRC), ginsiling sini nga 50 lamang ka mga PDL’s ang kinahanglan nga yara sa isa ka selda.
Apang sa karun, bangud sa kakulangon sang pasilidad yara na sa masobra 80 tubtob 100 ka mga preso ang naga-ululupod.
May posibilidad suno kay Yngcong nga masadig ang mga ini nga maka-angkon sang sakit bangud sa magamay kag gudok nga lugar.
Gani, dako ang ila paglaum nga madugangan kun tani sang pasilidad para sa mga preso.
Suno kay Yngcong nga wala sang problema sa CRC pag-abot sa suplay sang tubig, magluwas na lamang sa P55 nga budget sa pagkaon sang kada isa ka preso kun sa diin nabudlayan sila nga pag-igo-iguon sa sulod sang isa ka adlaw.
Mahibaluan nga may yara lamang sang P5.2-M nga pondo ang amu nga talatapan sa sulod sang isa ka tuig, apang ginklaro ni Yngcong nga kulang ini bangud nagadugang man ang preso sa kada tuig.
Bangud sini, nagrequest sila sang suplemental budget agud madugangan ini sang gobyerno probinsyal.
