Matapos ang big-time rollback, lauman ang pagtaas sa presyo sang gatong sa masunod nga semana.
Base sa international oil trading sa nakaligad nga apat ka adlaw, ginpahayag ni Department of Energy-Oil Industry Management Bureau Assistant Director Rodela Romero nga ang presyo sang gasolina ang mahimo nga magsaka sang P0.20 tubtob P0.45 kada litro.
Yara sa P0.20 kada litro naman ang ginalauman nga price hike sa diesel kag P0.45 tubtob P0.55 kada litro sa kerosene.
Ginpahayag ni Romero nga ang resulta sang trading sang Biyernes ang magadeterminar sa final adjustments nga igapatuman sa Martes, September 3.
Ang mga kompanya sang langis ang kinaandan nga nagaanunsiyo sang price adjustments kada Lunes nga ila nga ginapatuman pagka-Martes.
Sadtong nakaligad nga Martes, Agosto 27, ang presyo sang gasolina ang nagnubo sang P1.15 kada litro, diesel nga P1.90 kada litro, kag kerosene nga P1.85 kada litro.
Subong nga tuig, ang presyo sang gasolina ang nagtaas na sang P6.90 kada litro kag diesel nga P4.05 kada litro.
Nakalista naman ang kerosene sang year-to-date net decrease nga P4 kada litro.
