ROXAS CITY – 100 porsyento na nga preparado ang Philippine Red Cross ukon PRC-Capiz Chapter kag Local Government Unit sang Sigma, Capiz sa patigayunon nga Dugong Bombo 2020 sa maabot nga Biyernes, Nobyembre 13, 2020.
Nagpahanumdom naman si Municipal Health Officer Dr. Ma. Teresa Tan sa mga blood donors nga wala dapat sang balati-an kag wala sang may ginatumar nga bulong, may bastante nga tulog kag wala naka-inom sang makahulubog nga ilimnon kun may plano nga magdonar sang dugo.
Ginpahayag ni Tan nga daku man nga bulig sa isa ka tawo nga magdonar sang ila hamili nga dugo bangud maayo ini sa ikaayong lawas kun sa diin ginaislan ang daan nga dugo sang bag-o nga dugo.
Dugang pa sini nga pagasundon sa gihapon ang triage kag ang minimum health standards sa pagbaton sang blood donor.
Samtang, ginpahayag naman ni Mr. Ketch Armiza, Donor Recruitment Officer sang PRC-Capiz Chapter nga patigayunon ang bloodletting activity sa civic center sang amo nga banwa sa bulig man sang mga LGU’s kag Bombo Radyo Philippines ukon ‘Dugong Bombo 2020’.
Apisar nga nagapangatubang ang tanan sa COVID-19 Pandemic ginpasiguro sini nga ipatuman sa gihapon ang mga minimum health protocol pinaagi sa pag-obserbar sang social distancing, pagsuksok sang facemask kag faceshied.
Dugang pa sini nga antes magdonar sang dugo ang isa ka indibidwal igapaidalom pa ini sa interview ukon screening sang mga katapo sang PRC agud mahibaluan nga wala ini sang anuman nga balatian.
Ang makuha nga mga dugo sang PRC gikan sa mga successful donors ang sarang nga makabenepisyo sa mga nagakinahanglan ilabi na sa mga pasyente nga nagasuprehir sang nagkalain-lain nga mga balatian.
