ROXAS CITY – “A LITTLE PAIN A LIFE TO GAIN”
Dalayawon ang adbokasiya sang Bombo Radyo sa pagbulig sa mga nagakinahanglan pinaagi sa Dugong Bombo 2020 subong nga nagapangatubang ang pungsod sa Coronavirus Disease ukon COVID-19 Pandemic.
Kasunod ini sa ginpatigayon nga Dugong Bombo 2020 sa Civic Center sa Barangay Poblacion Sur, Ivisan, Capiz.
Suno kay Municipal Health Officer Dr. Mignon Andrada nga dalayawon ang bloodletting activity sa nasambit nga banwa bangud katuyuan sini nga makasugpon sa kabuhi sang tawo nga nagakinahanglan sang dugo.
Ginpahayag sini nga dako ang iya nga pagpasalamat sa Bombo Radyo bangud sa pihak sang pandemya nangin kabahin ini sa nasambit nga aktibidad agud nga makabulig sa mga pasyente nga nagasuprehir sang nagkalain-lain nga balatian.
Ginpahayag ni Andrada nga importante gid ang pag-amlig sa ikaayong lawas subong nga pandemya kag makabulig man ini agud makalikawan sa balatian nga cancer kag iban pa nga mga balatian.
Magluwas diri, ginpahayag ni Barangay Kagawad Joel Taborda nga nagpamalay-balay gid sila agud nga mag-engganyo sa mga residente nga magdonar sang ila hamili nga dugo.
Dugang pa sini nga apisar nga ginapatigayon ang nasambit nga aktibidad hugot sa gihapon ang pag-obserbar sang social distancing, pagsuksok sang facemask kag faceshield.
Mahibaluan nga gindagsa ang Dugong Bombo 2020 sang Bombo Radyo Roxas sa nasambit nga banwa agud mapakita ang ila bug-os nga suporta kun sa diin naglab-ot sa 77 ka mga blood donors ang natigayon nga makadonar sang ila hamili nga dugo.
