ROXAS CITY — Makabatyag pa sang trauma ang 19-anyos nga estudyante nga babaye sa iya nasaksihan sang magsakay siya sa isa ka itum nga van padulong kuntani sa siyudad sang Roxas.
Suno kay alyas Nene sa exclusive interview sang Bombo Radyo, nagsakay siya sa isa ka duag-itom nga Toyota Hiace nga van gikan sa isa ka banwa sa 1st district sang Capiz nga sa pagdumdom niya ang nagabiyahe padulong sa Roxas City bangud sa signboard sa unahan sang salakyan.
Kaupod niya sa sulod sang salakyan ang duha ka iban pa nga mga persona kag ang driver kag konduktor sang van.
Suno kay Nene nga sang malawig na ang distansiya nga ila ginbiyahe, ginkuhit siya sang makatatlo ka beses sang iya kaluyo nga babaye nga pasahero kag sang iya ini nga ginbalikid, ginkugmat siya sang makit-an nga duguon gali ang kilid sang babaye nga kasubong nagapangayo sa iya sang bulig.
Bangud sa tuman nga kahadlok ni Nene, nagsinggit siya sa driver nga manaog siya sa van apang wala pa siya ginpamatian sang driver.
Suno sa iya nga nagtinulokay pa ang driver kag ang iya kundoktor kag nag-istoryahanay, apang wala mahangpan ni Nene ang ila lengguwahe bangud kasubong nga Cebuano ang mga ini.
Apang nabatian niya nga may ginhambal ang driver nga lugar nga Joaquin kag kasubong may nagahulat sa ila didto nga isa naman ka puti nga van nga ila sayluhan.
Nagpamwersa si Nene nga makapanaog kag natabuan man nga may nagtawag sa iya nga cellphone, kag sa pagdumdom sang konduktor nga pulis ang iya naka-istorya, ginbuksan sini ang pwertahan kag didto siya nakaangkon sang kahigayunan nga makapanaog kag makadalagan palagyo.
Wala na mahibaluan ni Nene kun ano ang natabo sa duguon nga babaye nga iya kaluyo, apang ginpalab-ot na niya ang natabo sa mga kapulisan agud mahatagan sang nagakaigo nga aksiyon.
