ROXAS CITY – Duha ang patay sa magkatuhay nga insidente kagab-i kag kaina sang kaaganhon sa may bahin sang People’s Park, Barangay Baybay, sini nga syudad.
Sa interview sang Bombo Radyo kay Punong Barangay Erwin Oroceo, sang amu nga barangay nga sandig sa pagroving sang iya mga Brgy. Tanod, nga una nga natabo pasado alas-11 sa gab-i ang pagkasapo sa nagakaya nga bangkay sang wala na ginhingadlan nga foreigner, sa baybayon.
Nahibaluan nga antes ang pagkasapo sa biktima, ginpahayag nga sakay ini sa iya Wigo nga salakyan, apang nakasangit ini sang isa ka motorsiklo sa may bahin sang Brgy. Tanque, sini man nga syudad.
Apang, wala ini magpundo kag nagdiretso ini padulong sa Brgy. Baybay.
Pag-abot sa People’s Park, nagpundo ini kag may nakaistorya pa ini suno diri sa Brgy. Kapitan, antes nga nagpadulong sa baybayon.
Apang pagka-angan-angan, nag-abot ang driver sang motorsiklo kag ginpamangkot ang tawo sa People’s park kun diin na ang driver sang naka-park nga Wigo nga salakyan, kag gintudlo nga nagpanaog sa baybay sa pagdumdom nga maligo ini.
Wala magdugay, ginpangita na sang mga Brgy. Tanod sa dagat ang amu nga foreigner, apang sang ulihi nasapwan nalang ini nga nagakaya kag gintinguhaan nga salbaron, apang wala na ini naga-response.
Ginpatawgan ini sang Roxas City Emergency Response Team (RCERT) kag ginpadangat sa RMPH apang gindeklarar nga dead on arrival sang doktor.
Nagapadayon ang imbestigasyon sang mga kapulisan sa amu nga insidente.
Samtang, kaaganhon naman subong nga Sabado, nagluntad ang pagpangbuno sa biktima nga ginkilala kay Carlo Valencia, residente sang amu nga barangay, nga nagpadulong sa People’s Park matapos nga nalampusan sa ulo sa ini nga lugar ang iya Amo nga si ‘Dodoy Parel’.
Nakatuad pa sang mga pangalan si Valencia nga ginpahayag nagbuno sa iya, nga amu sanday alyas ‘Suli’ kag ‘Ron-ron’.
Subong nga aga, boluntaryo nga nagsungka sa mga kapulisan si Marc Nico Borro alyas ‘Suli’ 21-anyos, kag padayon ang imbestigasyon sang mga kapulisan angut sa krimen.
