Pilason ang lima ka mga tawo sa nagluntad nga paglupok matapos gin-alegar ginhaboyan sang granada sang duha ka wala makilala nga mga suspetsado ang salakyan sang militar sa higad sang National Highway sa Roundball, Barangay Mother Poblacion, Shariff Aguak, Maguindanao del Sur.
Suno sa inisyal nga imbestigasyon sang Shariff Aguak Municipal Police Station, ang mga tinawo sang 2nd Scout Ranger Battalion, 4th Scout Ranger Company, First Scout Ranger Regiment, Special Operations Command, Philippine Army, ang sakay sa isa ka KM truck—pakadto sa Isulan, Sultan Kudarat, para sa marketing purposes kon sa diin natabo ang insidente.
Nagaguwa sa imbestigasyon nga pag-abot sang salakyan sa lugar, nagpalapit ang duha ka wala makilal-an nga mga lalaki nga nagasakay sa itom nga motorsiklo kag ginpahayag nga naghaboy sang ginapatihan hand grenade antes madasig nga nagpalagyo.
Lakip sa mga pilason amo ang duha ka suldado nga may igo sang shrapnel wounds sa wala nga paa kag wala nga middle fingers. Tatlo man ka sibilyan ang napilasan: si John Dave, isa ka janitor sang isa ka mosque, nga nakaangkon sang shrapnel wound sa iya wala nga tiil; Bassir, nga napilasan sa tuo nga abaga; kag si Pamiya nga may pilas sa tuo nga butkon kag dughan.
Gilayon nga nagresponder ang mga personnel sang Shariff Aguak Municipal Police Station kag gindala sa Bangsamoro Regional Hospital and Medical Center ang tanan nga pilason para sa gilayon nga pagbulong.
Padayon pa nga ginahibalo sang mga otoridad ang motibo sa pag-atake.
