ROXAS CITY – Pilas ang naangkon sang duha ka college student, matapos ginaalegar ginluthang sang wala pa makilan-an nga suspetsado sa Barangay Rizal sa banwa sang Pontevedra.
Ginkilala ang mga biktima nga sanday Romark Restores 22-anyos, 4th year college, residente sang Brgy. Marita President Roxas, Capiz kag si Reneboy Bacero, 22-anyos, 3rd year college kag residente sang Brgy. New Guia Maayon, Capiz.
Sandig sa nakuha nga impormasyon sang Bombo Radyo nagikan sa Pontevedra Municipal Police Station ginapahayag nga nagpalab-ot sang reklamo si Nidle Elidio sang Brgy. Rizal, Pontevedra, Capiz nga may nagluntad nga insidente sa pagpangluthang sa amu nga lugar.
Bangud sini, gilayon nga ginpadulungan sang Pontevedra MPS ang ginluntaran sang insidente.
Suno sa mga kapulisan, samtang nagakaon ang mga biktima sa sulod sang ila puluy-an hinali na lamang nga ginpangluthang sang wala makilan-an nga suspek ang mga biktima gamit ang wala pa mahibaluan nga sahi sang armas luthang.
Bangud sa natabo, nag-angkon sang pilas sa wala nga tudlo si Restores kag sa tuo nga tiil naman si Bacero.
Madasig naman nga gindapatan sang pauna nga pagbulong ang mga biktima antes ginpadangat sa Bailan District Hospital si Espallerdo samtang nagpamalibad naman si Bacero.
Samtang, madasig naman nga nakapalagyo ang suspek kag sa karun padayon pa ang pagpatigayon sang hot pursuit operation sang mga kapulisan agud matumod kag madakpan ang suspetsado.
