Patay ang duha ka mga driver sang motorsiklo matapos nagbungguanay sa Barangay Tamulalod, Dumarao, Capiz.
Ang mga napatay amo si alyas June, 57-anyos, kag si alyas Fred, 44-anyos, nga lunsay mga residente sang nasambit nga banwa.
Sa Interview sang Bombo Radyo kay Police Lieutenant Russel Husmalaga, Officer-in-charge sang Dumarao Municipal Police Station, iya ginpahayag nga samtang ginasubay ni alyas June ang dalanon padulong sa Dumarao proper hinali nalang ini nga nag-overtake sa nauna nga motorsiklo kag aksidente nga bumunggo sa kasugata sini nga motorsiklo nga ginamaneho ni alyas Fred sakay ang iya sini nga asawa kag bata.
Bangud sa mabaskog nga impact lunsay nag-angkon sang patal nga pilas ang mga drive rasun sang ila kamatayon.
Samtang, nag-angkon naman sang pilas ang asawa kag bata ni alyas fred nga gilayon man nga ginbulong.
Ginpadangat pa ang mga ini sa ospital apang gindeklara nga dead on arrival si alyas June kag ginbawian man sang kabuhi si alyas Fred samtang ginabulong.
Sa subong padayon pa nag imbestigasyon sang mga kapulisan angot sa nasambit nga insidente.
Nagpanawagan man ang natungdan nga maghalong sa pagmaneho agud malikawan man ang pila ka mga insidente sa dalanon.
