Pilason ang duha ka driver sang motorsiklo matapos naaksidente sa Barangay Angub, Cuartero Capiz.
Ang mga biktima amo si alyas ‘Nilo’ 56-anyos kag si alyas “Wisle” 23-anyos lunsay mga residente sang nasambit nga banwa.
Sa interview sang Bombo Radyo kay Police Captain Jesse Lepaña, Officer-in-charge sang Cuartero Municipal Police Station, iya ginpahayag nga samtang ginasubay sang duha ang dalan gulpi nga nagliko si alyas “Nilo” sa wala nga bahin nga wala man lang nag-signal light rason nga bumunggo ang ginamaneho nga motorsiklo ni alyas ‘Wisle’.
Bangud sa mabaskog nga impact, nag-angkon sang nagkalain-lain nga pilas sa magkatuhay nga parte sang ila lawas ang Duha ka biktima.
Gilayon man nga nagresponde ang mga katapo sang Cuartero Emergency Response Unit kag gindapatan sang pauna nga nga pagbulong antes ini ginpadangat sa ospital.
Sa subong padayon pa imbestigasyon sang Cuartero Municipal Police Station angot sa nasambit nga insidente.
Nagpanawagan man ang natungdan sa mga motorista nga perme gid magahalong agud man malikawan ang pila ka mga insidente sa dalanon.
