Duha ka empleyado sang Capiz Provincial Government, ginaalegar nga nagpang-peke sang pirma agud makakuha sang kwarta

ROXAS CITY, CAPIZ- Gin-akusaran ang duha ka mga empleyado sang Capiz Provincial Government nga ginaalegar nagpang-peke sang pirma agud makakuha sang pondo sang gobyerno.

Ang gin-ilug nga pirma sang duha amo ang iya ni Deputy Provincial Administrator for 2nd District Rose Gardose.

Sa interview sang Bombo Radyo kay Atty. Luvim Amores, Provincial Information Officer kag Human Resource Management Office Head, iya ginpahayag nga ang isa sa duha ka empleyado ang na-assign sa Gender and Development (GAD) Office, samtang ang isa naman ang yara sa Office of the Governor antes sila nga nag-resign.

Suno kay Atty. Amores, nagpatigayon siya sang inisyal nga imbestigasyon matapos makalab-ot sa iya ang impormasyon.

Pahayag niya, may ara na sila sang mga ebidensya kag padayon pa gid nga ginatipon ang dugang sini agud masiguro nga mabaskog ang kaso batuk sa anay mga empleyado sang gobyerno.

Wala na gindetalye pa sang natungdan kun pila ang nakuha nga kwarta sang duha.

Nagpahanumdom man ini sa mga empleyado sang gobyerno nga dapat ipabilin ang integridad kag tampad nga serbisyo sa publiko.

Interviewed by Bombo Jessa Mae Siman De Los Santos