Duha ka indibidwal ang nadakpan matapos sila gin-alegar nga nagsulod sa isa ka balay nga wala sang permiso sa St. Francis Subdivision, Barangay Tanque, Roxas City, Capiz.
Ang nagreklamo amo si alyas Abraham, 55-anyos, kag residente sang Barangay II, Roxas City.
Suno sa iya, iya nadakpan ang mga suspek sa sulod sang balay sang iya utod nga wala sang iya pahanugot.
Ang mga suspek amo sanday alyas Rea, 25 anyos kag residente sang Malipayun Village, Barangay Tiza, kag alyas Roi, 41 anyos, residente sang Barangay San Jose, pareho gikan sa Roxas City.
Matapos madakpan sa akto ang mga suspek, gilayon sila gin-aresto sang nagreklamo kag nangayo sang bulig sa Barangay Police Assistance Team (BPAT) sang Barangay Tanque.
Ginbuligan sang BPAT ang pagdala sa mga suspek sa Roxas City Police Station para sa nagakaigo nga disposisyon kag imbestigasyon.
Sa subong,padayon ang imbestigasyon sang mga otoridad agud matumod ang nagakaigo nga kaso batok sa mga nasambit nga indibidwal.
