Patay ang duha ka mga indibidwal lakip na ang isa ka pulis matapos ginaalegar ginluthang sang isa pa ka pulis sa isa ka resort sa Maragondon, Cavite.
Ang mga napatay amo sanday Police Staff Sergeant Junmark Sisante, assigned sa Magallanes Police Station kag Arjay Mojica, isa ka civilian security aide para sa isa ka alkalde.
Pilason naman si Police Corporal Louie Climacosa sang Ternate Police Station.
Nadakpan ang suspek nga si Police Corporal Rolando Periodico Jr., 35-anyos nga assign sa Trece Martires City Police Station.
Sa inisyal nga imbestigasyon, naghalin ang mga biktima kag ang suspek sa isa ka kahiwatan sa resort kag nag-engkwentro sa parking lot.
Ginpahayag nga nagluntad ang pagbaisay rason nga ginluthang ni Periodico ang mga biktima.
Ginapatihan nga yara sa impluwensya sang makahulubog nga ilimnon ang suspek sang natabo ang insidente.
Padayon ang imbestigasyon sang mga otoridad agud mahibaluan ang eksakto nga motibo sa pagtiro sa biktima.
