Patay ang duha ka mga indibidwal sa panibag-o nga pag-atake sang US military sa isa ka sakayan sa nasidlangan nga bahin sang Pacific Ocean.
Suno sa US Southern Command, target ang amo nga sakayan pandagat bangud ginapatihan nga nag-agi ini sa ruta nga ginagamit sa drug trafficking, apisar nga wala sila sang ginpaguwa nga ebidensya.
Ini na ang ikaduha nga sunod-sunod nga adlaw sang sini nga operasyon.
Sang nagligad nga adlaw, lima ka tawo ang napatay sa separado man nga pag-atake.
Samtang, naglab-ot naman sa indi magnubo sa 170 ka tawo ang napatay sa sunod-sunod nga operasyon sang US sa Pacific kag Caribbean halin sang Setyembre sang nagligad nga tuig.
Ginakwestyon naman sang mga eksperto kag human rights groups ang mga pag-atake, nga posible maglapas sa international law kag mahimo magpuntirya sa mga sibilyan.
