Pilason ang duha ka indibidwal lakip na ang gabusong nga babayi matapos aksidente nga nagbungguanay ang isa ka pampasahero nga jeepney kag isa ka Army troop carrier truck sa Barangay Esperanza, Jamindan, Capiz.
Ang driver sang jeep amo si alyas ‘Gani’, 71-anyos, retired army, samtang ang driver naman sang Army troop carrier truck alyas ‘Eman’, 34-anyos.
Sa interview sang Bombo Radyo kay Police Captain Jaypee Silveste, officer in charge sang Jamindan Municipal Police Station, iya ginapahayag nga padulong kuntani ang jeep sa Roxas City sang naglapaw ini sa kurbadahon nga bahin sang dalan sang amo nga lugar.
Bangud sini, bumunggo ang jeep sa Army truck nga padulong naman sa Camp Peralta, sa nasambit man nga banwa.
Suno kay Silvestre, nag-angkon sang pilas ang driver sang jeep kaupod ang konduktor sini samtang maswerte naman nga luwas ang driver sang army truck nga gilayon man nga ginhatagan sang pagbulong.
Sa subong, nagapadayon pa ang imbestigasyon sang mga katapo sang kapulisan angut sa insidente.
