ROXAS CITY – Nagpabalhag sa Roxas City Police Station ang 59 anyos nga lalaki matapos nga ginkawatan sa Barangay Tiza, Roxas City.
Ginkilala ang tagreklamo kay Reymundo Alajar, residente sang Barangay Lanot, sining siyudad.
Sandig sa reklamo ni Alajar, samtang naka-park ang iya tricycle sa amo nga lugar kun sa diin iya ginbilin ang iya nga bag, nagbakal ini sa isa ka pharmacy.
Apang sa pagbalik sini sa iya nga tricycle, iya natukiban nga wala na ang iya bag nga may unod nga OR/CR sang iya tricycle, eyeglasses, mga ID’s kag mga importante nga mga dokumento.
Ginpakamaayo na lamang ni Alajar nga ipabalhag sa pulisya ang nasambit nga insidente.
Sa pihak nga bahin ginsulod man sang kawatan ang isa ka restaurant sa CAPSU-Dayao Campus sa Barangay Dayao, Roxas City.
Sandig sa ginpabalhag ni Rommel Buensalido, ginsulod sang wala matumod nga kawatan ang ila restaurant samtang ini ang nagapahuway.
Sa iya pagbangon kag pagtsekyar, natukiban sini nga wala na ang ila nga TV.
Bangud diri, ginpakamaayo na lamang ni Buensalido nga ipabalhag sa pulisya ang nasambit nga insidente.
