ROXAS CITY – Nagapabilin nga at-large ang nagaisahanon nga suspek nga responsable sa paghold-up sa lima ka mga estudyante sa duha ka separado nga lugar sa syudad sang Roxas kagab-i.
Nagpalangurog ang kalawasan sang mga biktima sang nagdangup sa Roxas City PNP samtang ginasaysay ang ila nabatyagan sang ginhold-up sang suspek sa Arnaldo Boulevard, Barangay Baybay kag Sitio Sto.
Nino.Ba-se sa panaysayon sang una nga biktima, gikan sila sa People’s park sang abyan kag nagapauli na sang makalabay sa madulom nga area.
Hinali nga nagtuhaw ang suspek kasunod ang pag-agbay sa iya kag pagtutuk sang armas.
Wala sang nahimo ang biktima sang ginkuha sang suspek ang iya bag nga nagaunod sang wallet, atm card, P100 , charger sang laptop kag cellphone nga nagabalor sang P8,000.
Ginpahayag pa sini nga pagkatapos nga makuha ang iya bag, kasubong nga wala lamang sang natabo, bangud naglakat lamang ang suspek nga ang direksyon padulong sa isa ka subdibisyon.
Samtang wala ma-orasan, nagpadulong naman sa istasyon sang pulisya ang tatlo ka mga biktima sang pagpanghold-up.Ba-se naman sa panaysayon sang ikaduha nga mga biktima nga nagapang-edaron sang 21-22-anyos nga nagatambay lamang sila sa higad sang karsada sa Sitio Sto.
Nino sang nagpalapit kag nagpamangkot sa ila ang suspek.
Ila man ginsabat ang suspek, apang nakibot sila nga nagbalik ini kasunod ang pagdeklara sang hold-up.
Gin-alegar pa sang mga biktima nga ginpahapa sila sang suspetsado kag ginkuha ang isa ka unit sang cellphone nga nagabalor sang P16,000 kag P2,000 nga kuwarta.
Matapos ang insedente, nagpadulong sila sa Roxas City PNP para i-report ang paghold-up sa ila.
Ginkakibot sang mga biktima nga antes sa ila may nauna nga ginhold-up ang suspek nga ila ginlaragway nga nagapang-edaron sang 50-anyos, mataas, maniwang, may kalo kag jacket.
Sa karon nagapadayon ang imbestigasyon sang kapulisan agud matumod ang identity sang suspek.
