Patay sa sunog ang duha ka mag-utod nga ginkandaduhan sa ila balay sa Misamis Occidental.
Sandig sa report, bangud luyag sang ila mga ginikanan nga protektahan ang duha nila ka anak samtang wala sila sa balay, ginkandado nila ini para indi makaguwa. Apang nangin rason ini sa katalagman sa duha ka mag-utod matapos nga masunog ang ila nga balay.
Ginpahayag nga nagapang-edaron sang duha ka tuig kag apat ka tuig ang napatay nga mag-utod nga nasapwan nga nagahaksanay sa ila nga nasunog nga balay sa Barangay Poblacion, Sinacaban, Misamis Occidental.
Sa imbestigasyon sang mga otoridad, ginbilin ang mag-utod sa ila nga balay nga human sa light materials bangud nag-trabaho ang ila mga ginikanan.
Suno naman sa Bureau of Fire Protection (BPF), layuay ang mga pamalay sa lugar gani wala gilayon nakaresponde ang mga kasilingan sang mga biktima.
Nagapadayon ang imbestigasyon sang mga otoridad kag ginahibalo pa ang rason sang sunog.
