Duha ka mag-utod nga may kaso nga Rape, arestado matapos ginserbihan sang warrant of arrest sa syudad sang Roxas

Arestado ang duha ka mag-utod nga may kaso nga Rape nga ginakabig Top 6 Most Wanted Person sa Provincial Level matapos ginserbihan sang warrant of arrest sa Malipayon Village, Barangay Tiza, Roxas City.

Ginkilala ang mga akusado nga sanday alyas “Nonoy”, 19-anyos, kag alyas “Toto”, 22-anyos, lunsay mga residente sang nasambit nga lugar.

Ang warrant of arrest ang gin-isyu kag ginpirmahan ni Hon. Judge Joan Marie Bargas-Betita sang Regional Trial Court, Sixth Judicial Region, Branch 14, Roxas City kag napetsahan sang Pebrero 25, 2025.

Ginrekomendar sang korte ang P200,000 nga piyansa, para sa temporaryo sini nga kahilwayan.

Sa karon, nagapabilin sa karsel sang Roxas City Police Station ang mga akusado, para sa nagakaigo nga disposisyon.