Nagpabalhag sang reklamo ang isa ka 33 anyos nga babaye matapos ginaalegar ginpahug nga pagapatyon ang pamilya sini sang isa ka lalaki bangud sa inaway sa patay nga manok.
Sandig sa ginpabalhag nga reklamo ni Mary Rose Lumangyao nga residente sang Malipayon Village, Barangay Tiza, Roxas City nga ginkompronta sang ni Aivan Asignacion, 27 anyos kag residente man sang nasambit nga lugar si Bob Vidal, ang amay sang nasambit nga tagreklamo bangud sa patay lamang nga manok.
Suno diri nga ginkaakig ni Asignacion ang pagkapatay sang iya nga manok sa ugsaran sini rason nga ginkompronta sini ang amay sang tagreklamo kag hinali nga ginhaboy sang patay nga manok.
Ginaalegar nga tuyo pa kun tani nga patup-an ni Asignacion ang amay sang tagreklamo apang madasig ini nga nga napunggan sang mga kaupod sini.
Magluwas pa sini, ginaalegar sang tagreklamo nga ginmulay, gin-insulto kag ginpahug pa ini sila nga patyon ni Asignacion rason nga ginpakamaayo nalang sang nasambit nga tagreklamo nga iparekord sa pulisya ang nasambit nga insidente.
Sa pihak nga bahin, ginparekord man sa pulisya ni Aivan Asignacion sanday Bob Vidal kag Frederick Torres kun sa diin nakitaan sini si Vidal nga may dala nga hilo sang ilaga rason nga ginkompronta niya ini angut sa pagkalamatay sang mga manok sini apang sa baylo nga sabton ini ni Vidal, hinali na lamang ini nga ginhabuyan sang mga patay nga ilaga.
Suno kay Asignacion nga samtang yara sila sa Barangay Hall, ginaalegar nga gintuaran ini ni Torres nga posible wala pa makaagi kastigo militar ang tagreklamo rason nga ginpakamaayo sini nga ipabalhag man sa pulisya ang nasambit nga insidente.
