Gina-imbestigaran sang mga otoridad ang duha ka magkatuhay nga paglupok nga na-record subong nga gab-i sa Cotabato City pila ka oras antes ang BARMM Parliamentary Elections nga nagresulta sa pagkapilas sang isa ka tawo.
Sa inisyal nga impormasyon gikan sa mga otoridad, ang una nga pagsigabong nagluntad sa Purok Amirol, MB Kalanganan, Cotabato City nga nagbilin sang isa ka indibidwal nga pilason.
Pila ka minutos lang ang nakaligad, isa naman ka paglupok ang narekord sa Datu Udtog Matalam, Malagapas, Barangay Rosary Heights 10, Cotabato City, las 8:10 sang gab-i.
Gilayon naman nga nagresponde sa lugar ang mga personnel sang Police Station 2 lakip na ang mga duty investigators nga ginapangunahan ni Station Commander PMAJ Tugaya Z. Alfonso matapos makabaton sang report halin sa isa ka concerned citizen.
Sa inisyal nga imbestigasyon, ginapatihan nga naghalin sa tumpok sang basura ang ikaduha nga paglupok, sa diin nakit-an man ang nagalinapta nga mga basura sa lugar.
Padayon pa nga ginahibalo sang mga otoridad ang eksakto nga gintunaan sang duha ka magkatuhay nga paglupok kag kun may responsable sa mga insidente.
