ROXAS CITY – Wala pa tobtob sa karon sang kaklaruhan kun san-o mabalik ang investment sang mga investors sa 25 Days Double your money investment scheme.
Ini matapos nga wala pa nabaton sang mga investors ang ila gin-invest nga kuwarta bangud kasubong nga nagabasulay kag nagatinudlu-anay ang duha ka mga kababainhan nga yara sa likod sang nasambit nga operasyon.
Ba-se sa impormasyon nga nakuha sang Bombo RAdyo nga si Madam JO sang banwa sang Sapian ang nagsugod sa operasyon sang 25 Days Double your money investment scheme, apang nagsulod si Madam KA, kilala nga konektado sa mga prominente nga pamilya sang Capiz.
Sa pagpati ni Madam JO nga daku ang mabulig ni Madam KA sa iya negosyo nag-upod sila sa pagpadalagan sa nasambit nga investment scheme.
Nahibaluan pa nga si Madam KA ang yara sa likod sang promo nga 15 days double your money nga nagpadamo pa sang mga investors.
Nagaguwa man sa pagpanalawsaw sang Bombo Radyo nga nakabakal na sang apartment si Madam JO samtang balay kag duta sa Barangay Baybay kag salakyan naman ang nabakal ni Madam KA, apang ginpahayag nga sang damlag lang ginbawi ang salakyan bangud wala ini nakabayad.
Matunog man karon ang estorya nga indi na mahibaluan kun diin nagkadto ang nangin investment sang mga investors bangud wala na nakapay-out ang kadam-an nga mga investors nga nagpasimpalad sa amo nga investment scheme.
Samtang ginpahayag nga duha ka semana sumugod subong kun indi pa sa gihapon mabalik ang investment sang mga investors, may yara na sang magareklamo kag posible magahimo sang nagakaigo nga tikang
