ROXAS CITY – Lunsay ginpangbawian sang kabuhi ang duha ka mga drayber sang motorsiklo, matapos ang nagluntad nga ginapahayag pagbungguanay sa may bahin sang National Highway sa Brgy. Cagay, Roxas City sadtong Agosto 6.
Sa impormasyon nga nagikan sa Roxas City Municipal Police Station, takna ala 1:37 sang kaagahun ginpahayag nga padulong sa syudad sang Roxas ang direksyon sang motorsiklo nga ginamaneho ni Kiven Roice Andrada Villaruz, 22-anyos, residente sang Barangay Sibaguan, Roxas City, samtang padulong naman sa banwa sang Ivisan ang direksyon sang motorsiklo nga ginamaneho ni Marlon Antioquia Balasa, 49-anyos kag residente sang Barangay Cudian banwa sang Ivisan.
Bangud sa mabaskog nga impact sang pagbunggoanay sang duha ka motorsiklo, nag-angkon sang patal nga kapilasan sa magkatuhay nga bahin sang lawas si Villaruz kag Balasa.
Ginpadangat pa sa ospital si Balasa apang gindeklarar ini nga dead on arrival, kag kahapon mga alas dos sang hapon ginpahayag nga ginbawian man sang kabuhi si Villaruz.
Sa karun nagapadayon pa ang imbestigasyon sang Roxas City Police Station sa nasambit nga insidente.
