ROXAS CITY -Arestado ang duha ka mga ginapatihan miyembro sang Communist Party of the Philippines – New People’s Army (CPP-NPA) matapos ginserbihan sang warrant of arrest sa Barangay San Jose Jamindan, Capiz.
Pinaagi sa gintingub nga pwersa sang Jamindan Municipal Police Station kag Provincial Intelligence Branch sang Capiz Police Provincial Office, natigayon nga maaresto sanday Hernani Farillon alyas “Ka Raquel” 54 anyos kag residente sang Barangay Sto. Rosario, Jamindan; Ireneo Graciadas alyas “Ka Darwin” 40 anyos kag residente sang Barangay San Nicolas, Tapaz, Capiz.
Ang nasambit nga mga arestado ang magapangatubang sang panombongon nga three (3) counts of Murder nga gin-isyu ni Hon. Daniel Antonio Gerardo Amular, Presiding Judge, 6th Judicial Region Branch 21, Regional Trial Court 6, Mambusao, Capiz nga napetsahan Agosto 31 tuig 2005.
Wala naman sang may ginrekomendar angkorte para sa temporaryo nga kahilwayan sang mga arestado.
Mahibaluan nga si Farillon kag Graciadas ang hugot nga gina-monitor kag nakilala bilang aktibo nga mga miyembro sang Central Front Committee of Kilusang Rehiyon- Panay (KR-P) nga nagalibot sa banwa sang Jamindan, Mambusao and Tapaz.
Ginpasindunggan naman ni Police Brigadier General Rene Pamuspusan, Regional Director sang Police Regional Office – 6 ang madinalag-on nga operasyon sang Jamindan MPS kag Capiz PPO.
Kadungan sini,ginhangakat ni Pamuspusan ang iban pa gid nga mga miyembro sang CPP-NPA nga dalayon na nga magsungka kag maghalin sa sabak sang rebelde nga grupo.
