ROXAS CITY – Naglab-ot sa isa ka bulan nga gintiktikan sang Mambusao Municipal Police Station ang duha ka mga persona nga ginakabig High Value Indibidual sa ginkasa nga drug buy bust operation sa Barangay Bula, Mambusao Capiz kagab-i Agusto 23.
Matandaan nga ginkilala ang mga nagkaladakpan nga sanday Marvin Alejaga, 38- anyos residente sang Pob. Tabuc sang nasambit nga banwa kag Athaniel Delfin, 18-anyos residente sang Pinalamatican, banwa sang Sigma.
Sa interview sang Bombo Radyo kay Police Captain Alladen Talaban, hepe sang Mambusao Municipal Police Station ginpahayag sini nga padayon ang ila paghimo sang mga tikang agud matapna kag malakip ang banwa sang Mambusao bilang drug cleared.
Mahibaluan nga nakuha sa posesyon sang mga nagkaladakpan ang 15 tanan ka plastic sachets sang ginaalegar iligal nga droga nga may estimated drug price P476,000 kag 6,500 nga buy bust money, coin purse kag isa ka motorsiklo nga Yamaha nagaduag orange.
Panawagan ni Talaban sa publiko nga likawan na ang kasubong sini nga bulahaton kag nagpalab-ot sang pagpasalamat sa mga pumuluyo nga padayon nga nagahatag sang kooperasyon sa ila mga ginapatuman nga mga pagsulundan.
