Nakilala na sang kapulisan ang identity sang duha ka mga indibidwal nga ginatudlo nga suspek sa pagpangluthang patay kay Police Captain Rian Fuentes Ampoyos sa sulod sang isa ka videoke ukon KTV bar sa Barangay Binuntucan, banwa sang Pontevedra, Capiz.
Ang duha ka mga ginatudlo nga suspek amo sanday alyas Boy kag alyas Juan, lunsay residente sang probinsya sang Capiz.
Sa interview sang Bombo Radyo kay Police Captain Mark Anthony M. Garcia, Officer-in-Charge sang Pontevedra Municipal Police Station, iya ginpahayag nga nakilala ang identity sang duha ka suspek matapos gin-divulge ni alyas William.
Suno pa kay Garcia, nakakuha man ang kapulisan sang dugang nga ebidensya paagi sa CCTV footage sa diin nakita nga si alyas Boy ang nagluthang patay kay Police Captain Ampoyos, baliskad sa nauna nga impormasyon nga si alyas William ang naghimo sang pagpangluthang.
Sa subong, ginahulat na lamang sang kapulisan ang warrant of arrest batok kanday alyas Boy kag alyas Juan.
Samtang nagapangatubang naman si alyas William sa kaso nga paglapas sang Republic Act No. 10591 ukon Comprehensive Firearms and Ammunition Regulation Act bangud wala sang License to Own and Possess Firearms (LTOPF), rehistro sang armas.
