ROXAS CITY – Dakup ang duha ka mga kalalakinhan matapos ginsulod kag ginkawatan ang isa ka Day Care Centre sa Barangay Cagay, Roxas City.
Sandig sa ginpabalhag nga reklamo sa pulisya ni Virgina Agusan, 51 anyos, Day Care Worker kag residente man sang nasambit nga lugar, nadiskubrehan na lamang sini nga ginsulod kag ginkawatan sang mga suspek nga sanday Raymark Cardona, 20 anyos kag Jayvon Aminacion, 19 anyos ang nasambit nga Day Care Center kun sa diin lakip sa mga ginkawat amo ang teddy bear nga nagabalor sang P500; Floor mat nga nagabalor sang P3,000 kag isa ka tangke sang Gasul nga nagabalor sang P4,000.
Natukiban sa imbestigasyon nga ginhukas sang mga suspek ang jalousie agud mahimo nga mangin alagyan pasulod.
Madasig nga gin-aresto ang duha ka mga suspek kag nagapabilin sa karon sa karsel sang Roxas City Police Station para sa nagakaigo nga disposisyon.
