ROXAS CITY – Karsel sang Dumalag Municipal Police Station ang gindangatan sang duha ka mga persona matapos ginaalegar nagtuga sang kinagamo kag nagpinalupok sang armas luthang sa Barangay Sto. Niño banwa sang Dumalag, Capiz.
Ginkilala ang mga ginareklamo nga sanday Jonel Firman, 29 anyos sang nasambit nga lugar kag Elijah Ben Are Castro, 39 anyos sang Barangay Sta. Cruz sang amo nga banwa.
Sandig sa ginpabalhag nga reklamo ni Barangay Kagawad Dennis Lusaya, 28 anyos sang Barangay Sto.Niño, Dumalag nga samtang naga-inom-inom ang duha ka mga nasambit nga ginareklamo, ginapatihan nga nagpinalupok sang armas luthang ang duha takna alas 2 sa kaagahon kahapon kag nagsinggitan takna alas nuebe sa aga sa kapareho nga adlaw.
Narekober naman ang anum ka mga basiyo sang calibre .38 armas luthang sa ginluntaran sang insidente.
Sa karon, ginahikot nalang sang nasambit nga Kagawad ang pila ka mga dokyumento para sa pagpasaka sang panumbungon batuk sa duha ka mga persona.
