ROXAS CITY – Nasipaan sa iya balikawang ang isa ka pulis, samtang masuwerte nga nakalikaw sa inumol ang upod man sini nga pulis, matapos nga nagresponde sa nagainaway nga mga hubog nga lalaki, alas-10:20 kagab-i sang Miyerkules, sa Sitio Marilac, Barangay Lanot, sini nga syudad.
Ginkilala ang mga biktima nga sanday PMSg. Elmer Almeida, 42-anyos kag Patrol team leader, kag kaupod sini nga si PSSg. Jun Apolinario, 40-anyos, nga lunsay mga personnel sang Roxas City PNP.
Samtang ang hubog nga lalaki ang ginkilala kay Anthony Rubio, 43-anyos, nga residente sang nasambit nga barangay.
Sandig sa impormasyon nagikan sa Roxas City PNP, nagpanawag ang common-law wife ni Anthony Rubio nga si Marivel Dela Cruz, agud parespondehan sang kapulisan ang naga-inaway nga sanday Rubio kag Reggie Jabalo.
Gilayon man nga ginpadulungan sang mga nasambit nga pulis ang lugar, kag akto nga naabtan ang duha nga nagatapungulay.
Gintinguhaan nga tambagan ni PMSg. Almedia apang naigo ini sa iya balikawang sang ginsipa ni Rubio, kag masuwerte nga nakalikaw si PSSg. Apolinario sang ginsumbag ini sang nasambit nga lalaki.
Bangud diri, ginkustodiya si Rubio sa Roxas City PNP kag natalana nga pasakaan sang nagakaigo nga panumbungon sa pagbato sa otoridad.
