ROXAS CITY – Desidido ang duha ka mga traffic auxiliary nga pamadlaon ang tatlo ka mga menor de edad nga sakay sa motorsiklo, matapos nga ginpangbungguan ang mga ini sa syudad sang Roxas.
Ginkilala ang mga traffic auxiliary nga sanday Ricky Ortega kag Jonas Rogando.
Suno kay Ortega nga ginsita niya ang motorsiklo nga sakay ang tatlo ka mga kabataan nga ginabulubanta 17-anyos, nga residente sang syudad sang Roxas, sa bahin sang Arnaldo Blvd. sini nga syudad, apang sa baylo nga magpundo ang mga ini, ginbungguan pa si Ortega.
Bangud sini, ginpahibalo sini sa iya mga kaupdanan kag ginparahan man ni Rogando, sa unhan sang RMPH, apang sa liwat nga kahigayunan, ginbungguan man sang mga ini si Rogando.
Natigayon nga madakpan ang mga kabataan sa may bahin sang Burgos St.
Masuwerte nga wala nag-angkon sang mga seryoso nga kapilasan sa lawas ang duha ka mga traffic auxiliary.
Wala man ginpahayag kun ano nga bayulasyon sa trapiko ang ginlapas sang mga kabataan.
Sa karon, nagapabilin ang motorsiklo nga ginsakyan sang mga kabataan sa traffic section sang Roxas Component City Police Station para sa nagakaigo nga disposisyon.
