ROXAS CITY, CAPIZ – Pilason ang duha ka persona matapos nagbungguanay ang motorsiklo kag SUV sa Sitio Binalabag, Brgy. Sibaguan, Roxas City.
Ang driver sang angkar-angkar amo si Cristopher Arciga y Aducal, yara sa legal nga pang-edaron, residente sang Brgy. Balijuagan, Roxas City kaupod ang backrider nga si Ernesto Borlado Jr. nga yara man sa legal nga pang-edaron.
Sa interview sang Bombo Radyo kay Police Chief Master Sergeant, Spokesperson sang Roxas Component City Police Station, base sa ila imbestigasyon samtang ginasubay ni Arciga ang karsada padulong sa Roxas City proper, nag-overtake ini sa isa ka tricycle sa nawala nga bahin, rason nga bumunggo ini sa kasugata nga Toyota Rush nga ginamaneho ni Elmer Arroyo y Gregorio, residente sang Brgy. Punta Tabuc, Roxas City.
Bangud sa makusog impact sang pagkabunggo, nag-angkon sang mga pilas sa nagkalain-lain nga bahin sang lawas sanday Arciga kag Borlado.
Gilayon ang mga ini nga ginhatagan sang first aid sang mga tinawo sang Roxas City Emergency Response Team (RCERT) kag Bureau of Fire Protection (BFP) – Roxas City, antes ginsugod sa Roxas Memorial Provincial Hospital para sa nagakaigo nga pagbulong.
Samtang, wala naman nag-angkon sang samad si Arroyo sa aksidente nga gilayon gindala sa Police Station.
Pareho naman nga nagkalaguba ang atubang nga porsyon sang motorsiklo kag SUV.
Sa karon, padayon ang imbestigasyon sang kapulisan angut sa nasambit nga insidente.
