Gina-imbestigaran sang Philippine Embassy sa United Arab Emirates ang mga report nga duha ka mga Pinoy ang nadakpan sa Dubai bangud sa gina-alegar pagrekord kag pagpaambit sang mga video may kaangtanan sa mga nagluntad nga pag-atake sa nasambit nga pungsod.
Suno sa Philippine Embassy sa Abu Dhabi kag Consulate General sa Dubai, nagpangayo sila sang opisyal nga kumpirmasyon kag impormasyon gikan sa mga otoridad sang UAE sa identity, current status, kag legal nga sitwasyon sang duha ka mga Filipino nga nadalahig.
Suno sa mga opisyal, ginatahod sang Pilipinas ang soberanya sang UAE kag ang pagpatuman sini sang national security, cyberycrime, kag public order kasunod sang pahanumdom sang mga awtoridad sang UAE nga ang pagpaambit sang sayop ukon wala napamatud-an nga impormasyon sa seguridad, lakip ang mga video sang air defense interceptions, pag-atake sa mga landmark, mangin ang AI-generated video, mahimo nga makabig nga isa ka krimen nga mahimo ka mapreso kag may mabug-at nga multa.
Bangud sini, nagpanawagan ang mga diplomatic officials sa mga Pinoy sa UAE nga mangin tuman ka mahinalungon sa ila mga aktibidad sa internet kag nagpanugyan sa komunidad nga likawan ang pagkuha sang mga video, pagpost sa internet ukon pagkomento sa wala kumpirmado nga mga bagay sa seguridad, kag sa baylo magpamati lamang sa mga opisyal nga pahayag sang gobyerno sang UAE.
