Ginkumpirmar ni NBI Director Jaime Santigao nga nagpasaka na sila sang reklamo sa Department of Justice batuk sa isa ka Chinese national kag duha ka Pilipino bangud sa ginapahayag nga pagkaulamid sang mga ini sa pagiging espionage ukon pagpang-espiya sa pungsod.
Ginkilala sang NBI ang mga suspect nga sanday Yuanqing Deng kag duha ka Pilipino nga sanday Ronel Jojo Balundo Besa kag Jayson Amado Fernandez.
Ginpahayag ni NBI Cybercrime Division chief Jeremy Lotoc nga nangin madinalag-on ang pag-aresto sa bulig sang mga tinawo sang Armed Forces of the Philippines.
Suno kay Lotoc, ang Chinese national nga ila nadakpan ang graduate sa unibersidad nga ginadumalahan sang People’s Liberation Army.
Ang People’s Liberation Army amu ang military sang Chinese Communist Party kag People’s Republic of China.
Expert man ang ginaalegar nga chinese spy sa control engineering samtang naaresto ini sa sulod sang salakyan nga ginamaneho sang duha ka Pilipino.
Sandig sa impormasyon sang NBI , masobra lima ka tuig na nga nagatinir sa Pilipinas ang nasambit nga Chinese Spy kag ini ang sleeper agent sang China.
Suno naman kay AFP chief-of-Staff Gen. Romeo Brawner, Jr., napadulungan na sang grupo sini ang mga lugar kun sa diin nakatukod ang Enhanced Defense Cooperation Agreement (EDCA) sites.
