PRESIDENT ROXAS, CAPIZ- Pilason ang duha ka lalaki matapos magbungguanay ang ila ginamaheno nga mga motorsiklo sa National Highway sa Barangay Poblacion, President Roxas, Capiz.
Ang mga driver nga naulamid amo sanday alyas “Karl”, 47-anyos nga residente sang Sitio Swa C, Brgy. Poblacion, President Roxas, kag alyas “Bobby”, 20-anyos nga residente sang Jolongahog, Pontevedra.
Sa interview sang Bombo Radyo kay Police Major Alfred De Leon, Hepe sang President Roxas Municipal Police Station, iya ginpahayag nga gilayon nga nagresponde sa insidente ang personnel sang President Roxas PNP matapos makabaton sang tawag angut sa insidente.
Base sa inisyal nga imbestigasyon, pareho nga ginasubay sang duha ka motorsiklo ang direksyon padulong sa Pontevedra, Capiz halin sa Barangay Poblacion sang matabo ang aksidente.
Gintuyo sang motorsiklo nga nga ginamaneho ni Karl Glenn nga mag-overtake sa ginasundan nga motorsiklo nga ginamaneho ni Bobby apang nadulaan sang kontrol ang driver rason sang pagbungguanay sang duha sa atubang sang isa ka kilala nga convenience store.
Nag-angkon sang head injury kag mga gasgas si Karl Glenn kag gilayon nga ginsugod sa Bailan District Hospital antes ginsaylo sa Roxas Memorial Provincial Hospital para sa dugang nga pagbulong. Si Bobby naman ang nag-angkon man sang mga pilas kag gindala sa Rural Health Unit sang President Roxas.
Nahibaluan nga wala sang lisensiya sa pag-drive ang duha kag gindala na sa istasyon sang pulisya ang mga motorsiklo para sa nagakaigo nga disposisyon.
Padayon ang imbestigasyon sang mga otoridad angut sa insidente.
With a report from Bombo Jessa Mae De Los Santos
