Roxas City- Nagpapadayon sa karun ang imbestigasyon sang mga otoridad sa natabo nga pagsunog sa duha ka ten wheeler truck sa separado nga mga lugar sa probinsya.
Una diri, ginkakibot sang isa sa mga residente sang Barangay Agkilo, Panit-an ang hinali nga pagkalayo sang naga-parking nga ten wheeler truck pasado alas dose kaina sang mag-aga.
Madasig naman nga napalong ang kalayo sang mga residente.
Ginsundan ini sang pagkasunog sang ten wheeler truck sa Barangay Bolo sining syudad.
Mahibaluan nga ginapanag-iyahan ni Myla Muyco sang MBM Construction ang nasambit nga mga truck.
Sa karun padayon pa nga ginahibalo sang mga otoridad kun sin-o ang yara sa likod sang natabo nga pagpanunog.
Matandaan nga sang nagligad nga semana, isa man ka road grader nga heavy equipment ang ginsunog sang mga wala pa matumod nga mga suspek sa Barangay Mianay, Sigma.
