NEW YORK – Patay ang duha ka nga indibidwal samtang yara naman sa masobra 20 ka mga indibidwal ang pilason matapos nga bumunggo ang isa ka Mexican Naval Ship sa Brooklyn Bridge sang Sabado sang gabi, (Dominggo sa Pilipinas) suno kay Mayor Eric Adams.
Suno sa U.S. Coast Guard, 21 ka mga indibidwal ang napilasan nga gilayon ginsakay sa mga magagmay nga bangka padulong sa pang-pang antes nga gindala sa ospital.
Una na nga ginsiling ni Adams nga 19 ang napilasan, duha ang yara sa kritikal nga kondisyon, kag duha ang ginbawian sang kabuhi bagud sa patal nga mga pilas nga naangkon sang mga ini.
Natabo ang insidente takna alas 8:20 sang gab-i, (oras sa America) suno kay Chief Wilson Aramboles sang New York Police Department (NYPD) Special Operations Division.
Suno naman sa alkalde, ang amu nga barko, ang may sakay nga 277 ka mga persona, kun sa diin nadulaan ini sang kontrol bangud sa mechanical error samtang manug-luwas gikan sa Pier 17 nga padulong kuntani sa Iceland.
Ang amu nga barko ang ginkilala nga ARM Cuauhtémoc, isa ka training vessel sang Mexican Navy.
Duha ka mga tripulante naman nga yara sa palo ang napilasan.
Wala man sang may nalagbong sa tubig, apang gilayon nga ginpatigayon ang inspeksyon sa tulay.
Suno kay Department of Transportation Commissioner Ydanis Rodriguez, wala sang may nakit-an nga seryoso nga halit sa Brooklyn Bridge.
Apang, ang mga operasyon sa East River temporaryo nga ginsirado, kag ang isa ka “safety zone” gintukod sa tunga sang Brooklyn kag sang Manhattan Bridge.
Makit-an sa mga nagalapta nga video ang duha ka palo sang barko nga nag-igo sa tulay, samtang may mga persona nga nakasab-it diri.
Makit-an man ang mga nagkalapilasan nga ginsakay sa stretcher matapos ang insidente.
Ginkumpirmar ni Esteban Moctezuma Barragán, ambassador sang Mexico sa U.S., nga ang barko ang kabahin sang Mexican Navy, samtang indi ini opisyal na kalakip sa Sail4th 250 event sa 2026.
Samtang, padayon ang imbestigasyon sang NYPD kag ginalauman man nga magapatigayon sang separado nga imbestigasyon ang National Transportation Safety Board (NTSB).
Ginpanugyanan naman ang publiko nga likawan danay ang lugar nga malapit sa tulay.
