Pilason ang driver kag backrider matapos makabunggo ang ila ginamaneho nga motorsiklo sa ginasundan nga salakyan sa Barangay Ilaya, Ivisan, Capiz.
Ang driver sang motorsiklo ano si alyas “Doy,” 43-anyos, samtang ang backrider sini amo si alyas “Mae,” 19-anyos, isa ka estudyante kag lunsay mga residente sang Barangay Burias, Mambusao, Capiz.
Samtang ang driver naman sang salakyan nga involved sa aksidente amo si alyas “Alberto,” 57-anyos, residente sang Barangay Ilaya, Ivisan, Capiz.
Sa interview sang Bombo Radyo kay Police Captain Rile Villariez, Hepe sang Ivisan Municipal Police Station (MPS), iya ginpahayag nga samtang ginasubay sang motorsiklo ang dalan padulong sa Mambusao hinali ini nga nabungguan ang likod nga bahin sang salakyan nga ginasundan kag ginamaneho ni Alberto.
Bangud sang mabaskog nga impact, nagtabog ang driver kag backrider sang motorsiklo kag nag-angkon sang mga pilas sa nagkalain-lain nga bahin sang ila lawas.
Gilayon man nga nagresponde sa lugar ang Capiz Emergency Response Team (CERT) kag gindala sa ospital ang mga biktima para sa nagakaigo nga pagbulong.
