ROXAS CITY – Yara na sa kustodiya sang Roxas City Police Station ang duha sa apat ka mga suspek sa nagtiro-patay kay Retired Master Sergeant Joniffer Borda sa Barangay Bolo, Roxas City.
Sa interview sang Bombo Radyo sa hepe sang Roxas City Police Sation nga si Police Lieutenant Colonel Ricardo Jomuad Jr., nga ginkilala ang nasambit nga mga suspek nga sanday Garry Onilan 39-anyos sang Sitio Bato-Bato Barangay Dulangan, Pilar kag Rogelio Padernal isa man ka security guard sang Gold Claw Security Agency kag residente sang Angelville Subdivision, Barangay San Jose, sining siyudad.
Suno kay Jomuad nga una nadakpan sang mga kapulisan si Padernal nga ginapahayag mastermind sa pagpatay kay Borda nga amo ang naghatag sang impormasyon natuhoy sa ginapulian ni Onilan.
Magluwas diri, pinaagi man sa bulig sang mga concern citizens kag mga nakuha sa mga CCTV footages, natigayon nga nadakpan ang duha ka mga suspek.
Narekober naman sa balay ni Onilan ang armas-luthang nga kalibre .45 nga ginapatihan gingamit sini sa pagtiro sa biktima, motorsiklo nga nagaduag itom, jacket kag helmet.
Suno kay Jomuad nga base sa pagbayluhanay sang mga text messages sang mga suspetsado, ginapahayag nga hold-up gid lamang ang plano sang grupo.
Apang, aminado si Onilan nga siya ang nagtiro sa biktima kag gin-ubos sini ang bala sang amo nga armas-luthang nga gingamit sa pagpatay kay Borda.
Dugang pa ni Jomuad nga ibakal sang droga sang mga suspek ang kuwarta nga ginkawat nila sa biktima.
Samtang, padayon pa nga ginaayam sang mga kapulisan sanday certain Eric kag Ian nga ginapahayag imbolbado man sa pagpatay kay Borda.
Nahibaluan nga nadakpan sa banwa sang Pilar si Onilan samtang sa Barangay San Jose, sining siyudad naman si Padernal.
