BANICA ROXAS CITY – Anay na nga napreso ang duha sa tatlo ka mga nagkaladakpan sa ginkasa nga drug buy-bust operation sang mga kapulisan sa Crossing Bato, Barangay Banica, Roxas City.
Matandaan nga ginkilala ang mga nagkaladakpan nga sanday alyas Joel, residente sang Barangay Balijuagan, alyas menandro, residente sang Barangay 11 kag alyas Christian nga residente naman sang Barangay Inzo, sining syudad kag lunsay yara sa legal nga pang-edaron.
Sa interview sang Bombo Radyo kay PLt Swelen Pinalba, PIO sang CPPO ginphayag sini nga madugay na nila nga ginatiktikan ang nasambit nga mga persona tubtob nga nadakpan sa akto ang mga ini.
Sa ginpatigayon nga operasyon, nakuha sa ila paghinakop ang 33 tanan ka sachets sang ginapatihan shabu kag may kabug-aton nga 150 gramos kag may Standard Drug Price kapin P1-M, P100.00 nga buy-bust money, P14,900 nga counterfeited money sa nagkalain-lain nga denominasyon, 1 unit sang cellphone kag mga drug paraphernalia’s.
Kaso nga paglapas sa R.A 9165 ukon “Comprehensive Dangerous Drugs Act of 2002”, ang paga-atubangon sang mga nagkaladakpan.
Sa karon, yara na ang mga ini sa kustodiya sang Roxas City PNP para sa nagakaigo nga disposisyon.
