Gin-athag ni Dumarao, Capiz Mayor Mateo Hachuela nga ginasunod lamang sang local government ang advisory sang Department of Agriculture (DA) sa pagdumili sang pagpasulod sang buhi nga baboy, karne sang baboy kag iba pa nga pork products.
Ini kasunod sang pagkumpiska sang mga pork products kaangay sang hotdog kag tocino sa border control checkpoint sa Barangay Aglalana, Dumarao.
Sa interview sang Bombo Radyo kay Mayor Hachuela, iya ginpahayag nga hugot nila nga ginapatuman ang Executive Order No. 21 Series of 2026 agud maprotektahan ang lokal nga industriya sang hog raising kag malikawan ang pagsulod sang African Swine Fever (ASF) sa banwa.
Dugang pa sang alkalde, gilayon nga ginpalubong ang mga nakumpiskar nga pork products agud malikawan ang posible nga paglapta sang African Swine Fever (ASF).
Nahibaluan nga wala pa sang kaso nga African Swine Fever sa banwa sang Dumarao.
